Reganosa quedou oficialmente constituída no 1999, co obxecto social de establecer unha planta de regasificación en Mugardos e un gasoducto. Non obstante, foi o 20 de marzo de 2000 cando se creou a asociación de promotores, nun acto celebrado en Santiago de Compostela baixo a presidencia de Manuel Fraga Iribarne, titular do Goberno de Galicia.

Xusto un ano despois, en marzo de 2001, asinouse o Acordo de Socios que establece o réxime de goberno da entidade e regula as relacións entre as entidades participantes. Foi daquela cando se configuraron definitivamente os órganos da administración e xestión da compañía.

O proxecto básico da planta foi presentado oficialmente ó Ministerio de Industria o 11 de marzo de 1999. Posteriormente realizáronse os trámites correspondentes ante as administracións Local, Autonómica e Central, ata que o 3 de xuño de 2002 o Ministerio de Industria outorgou a súa autorización provisional. A definitiva foi firmada o 13 de febreiro de 2004 pola directora xeral de Política Enerxética e Minas.

Reganosa adxudicou en 2003 a construción da terminal a Tractebel Gaz Engineering, que comezou a operar no emprazamento en febreiro do ano seguinte. Tamén en 2004 resolveuse o concurso para o tendido dos gasodutos, encargando os traballos ás compañías Masa (ramal Norte) e Soluziona-Gisca (ramal Sur).

En outubro de 2005, Regasificadora do Noroeste subscribiu con BBVA, Caixa Galicia e outras entidades financeiras un crédito sindicado de 416 millóns de euros para executa-lo proxecto. Este último paso supuxo, segundo o presidente executivo da compañía naquel momento, Félix Alonso Encinas, “un feito relevante co que conclúe o que podemos chamar a etapa administrativa da construción de Reganosa”.

A entrada en operación comercial da planta realizouse en novembro de 2007, se ben no primieiro cuadrimestre do mesmo ano entrou o primeiro metaneiro e se puxeronen frío os dous tanques da terminal.